بالعربي المشبرح ... ما بعرف
عشيي كان القمر نيشان بارودي مهرهرة ،
وضفادع اللي بالوادي خوتاني ...
فكرت فيك ِ ..
كانت الدرب خيال والجايي عتم ،
والوقت سعدان عم يقلد مشية ختياريي بالكاد بيسمعو ،
وخوري عم يوعظ قدامن ،
والمبخرة متل داخون مسطم ،
وأنت ِ متل سراج ،
متل جلدة الانجيل الأولانيه ، ع
كتفك نعس الليل ، وبعيونك شمس الضهر ..
عشيي قبل ما الورد ينسى حالو بلا بكي ،
فكرت فيكِ ..
شفت بالجل الفوقاني قمر ..
يمكن قمر ..
يمكن عتمة ضو فزعاني من خيالا ،
ونتفة د خني سودا بتنزل شتي ...
كل ما الكلمي بتلزق ع تمي ، بفكر حالي عم تأتىْ ،
حابب الجبال تعرف...
لهيك بتطلع ع الشير العالي وبسكت .
مني عم أعرف ليش الصخور ما بتحمل كمنجة وتدندن
يا ريت عندي قلم ولد زغير ،
خرفش شكال ما تخطر براس حدا ، أرسمك وأعرفك وحدي
ياريت عندي رشة زعل ،
ازرعلك فيها بوسي، ريحة التزعبر طالعا منها ،
ربيها واسقيها واقطفلك ياها بشي ليلة عتب ..
كل ما خلص كتاب الغزل ،
بفكر حالي عم تأتىْ ،
وكل ما كلمات الومي تخبو ، بتخجل الدني من حالا ...
كل يوم رح أمرق ع كرم الحكي ، حوشلك كمشة شِعر تلبق لشَعرك ،
والناس نواطير سهراني ع كرومها
والديب مخنشل بهيشة الوجع ..
قربي صوبي شوي ،
ليكي السما ، كومة رماد مفشكلي .
ليكي الارض ، متل المقطوع من الدخان بآخر الليل .
ليكي الدني خرماني ..
كيف بدي حبك ؟
أنت خيال جايي من سهرة ما انبسط فيها حدا ،
وأنا فزيع ..
وين بدي حبك ؟
خلف الصقعة المجدولي ع دواير الشوب ،
وأنا عريان ...
ليش هلقد بحبك ؟ ما بعرف .
ليست هناك تعليقات:
إرسال تعليق